Lankatime ලංකා වේලාව

உயிரிழந்தவர்களுக்கு ஒரு மில்லியன் ரூபா இழப்பீடு - அரசு தீர்மானம்

April 22 2019 , Written by lankatime

நாட்டின் பல்வேறு இடங்களில் நேற்று இடம்பெற்ற குண்டு வெடிப்புக்களின் போது உயிரிழந்தவர்களுக்கு

தலா ஒரு மில்லியன் ரூபாயை இழப்பீடாக வழங்குதற்கு அரசாங்கம் தீர்மானித்துள்ளது.

இதனுடன் இறுதி சடங்குளுக்காக ஒரு லட்சம் ரூபாயை வழங்குதற்கு இன்று காலை இடம்பெற்ற அமைச்சரவை கூட்டத்தின் போது தீர்மானிக்கப்பட்டுள்ளது. மேலும் காயமடைந்தவர்களுக்கு ஒரு லட்சம் முதல் மூன்று லட்சம் வரை இழப்பீடாக வழங்கவும் தீர்மானிக்கப்பட்டுள்ளது.

கொட்டஞ்சேனை கிருஸ்தவ தேவாலயத்திற்கு அருகில் சற்று முன்னர் மற்றுமொரு குண்டு வெடிப்பு சம்பவம்

April 22 2019 , Written by lankatime

கொட்டஞ்சேனை கிருஸ்தவ தேவாலயத்திற்கு அருகில் சற்று முன்னர் மற்றுமொரு குண்டு வெடிப்பு சம்பவம் பதிவாகியுள்ளதாக தெரிவிக்கப்படுகின்றது.

குண்டு செயலிழப்பு செய்யும் அணியினர் மற்றும் விசேட அதிரடிப் படையினர், தேவாலயத்திற்கு அருகில் இருந்த வேன் ஒன்றை சோதனையிடும் போது, குறித்த வெடிப்பு சம்பவம் இடம்பெற்றுள்ளது.

இந்த சம்பவத்தில் எவருக்கும் பாதிப்பு ஏற்படவில்லை என பொலிஸ் ஊடகப் பேச்சாளர் அலுவலகம் தெரிவித்துள்ளது.

வெடிப்புச் சம்பவங்கள் தொடர்பில் கைது செய்யப்பட்ட 9 பேருக்கு விளக்கமறியல்

April 22 2019 , Written by lankatime

நாடளாவிய ரீதியில் நேற்று (21) காலை முதல் இடம்பெற்ற வெடிப்புச் சம்பவங்கள் தொடர்பில் சந்தேகத்தின் பேரில் வெல்லப்பிட்டிய பொலிஸாரினால் கைது செய்யப்பட்ட 9 பேரை விளக்கமறியலில் வைக்குமாறு கொழும்பு நீதவான் நீதிமன்றம் உத்தரவு பிறப்பித்துள்ளது.

குறித்த நபர்களை மே மாதம் 6 ஆம் திகதி வரை விளக்கமறியலில் வைக்குமாறு கொழும்பு மேலதிக நீதவான் சன்ன சாலிய அபேரத்ன உத்தரவிட்டுள்ளார்.

குறித்த சந்தேகநபர்கள் ஒன்பது பேரில் முஸ்லிம்கள் ஏழு பேர், சிங்களவர் ஒருவர் மற்றும் தமிழர் ஒருவரும் உள்ளடங்குவதாக தெரிவிக்கப்படுகின்றது.

நேற்று (21) ஷங்கிரி - லா ஹோட்டலில் இடம்பெற்ற தற்கொலை குண்டு தாக்குதலில் உயிரிழந்த சந்தேக நபர் மற்றும் தெமடகொட பகுதியில் இடம்பெற்ற தற்கொலை குண்டு தாக்குதலில் உயிரிழந்த இரு பெண் ஆகியவர்களுக்கு சொந்தமான தொழிற்சாலை ஒன்று அவிஸ்ஸாவெல்ல வீதி, வெல்லம்பிட்டிய இருப்பதாக வெல்லம்பிட்டிய பொலிஸார் நீதிமன்றத்திடம் தெரிவித்துள்ளனர்.

கைது செய்யப்பட்ட குறித்த சந்தேகநபர்கள் அந்த தொழிற்சாலையில் கடமையாற்றுவதாகவும் அவர்கள் தற்கொலை குண்டு தாக்குதல் நடத்தியவர்களுடன் தொடர்புபட்டு குறித்த குற்றத்திற்கு உதவி செய்தார்களா என விசாரணை செய்வதற்காகவே கைது செய்யப்பட்டுள்ளதாக தெரிவிக்கப்படுகின்றது.

குறித்த சந்தேகநபர்கள் குற்றத்துடன் தொடர்புபட்டுள்ளனரா என விசாரணை செய்வதற்காக அவர்களை விளக்கமறியலில் வைக்குமாறும் அவர்களுடைய தொலைபேசி அழைப்பு தொடர்பான அறிக்கை பெற்றுக் கொள்ளுமாறும் நீதிமன்றம் உத்தரவிட்டுள்ளது.