கலிபோர்னியா : வினாடிக்கு 50 ஐபோன்கள் விற்பனையாகியுள்ளதாக ஆப்பிள் நிறுவனம் தெரிவித்துள்ளது. இதுதொடர்பாக, ஆப்பிள் நிறுவனம் வெ ளியிட்டுள்ள செய்திக்குறிப்பில் தெரிவிக்கப்பட்டுள்ளதாவது,
தங்கள் நிறுவனத்தின் புதுவரவான ஆப்பிள் ஐபோன் 6 எஸ் மற்றும் ஐபோன் 6 எஸ் பிளஸ் போன்கள் சர்வதேச அளவில் பெரும் வரவேற்பை பெற்றுள்ளன. அமெரிக்கா மற்றும் சீனாவில் மட்டும், 3 நாட்களில் 13 மில்லியன் ஐபோன்கள் விற்பனையாகியுள்ளன. இது வினாடிக்கு 50 ஐபோன்கள் விற்பனையானதற்கு நிகர் என்று தெரிவிக்கப்பட்டுள்ளது.
ஆப்பிள் நிறுவனத்தின் முந்தைய தயாரிப்பான ஐபோன் 5 விற்பனை , 3 நாட்களில், 10 மில்லியன் என்ற அளவிலேயே இருந்தது. இதுவே சாதனையாக கருதப்பட்ட நிலையில், ஐபோன் 6 எஸ் மற்றும் ஐபோன் 6 எஸ் பிளஸ் போன்களின் விற்பனை 3 நாட்களில் 13 மில்லியன் என்ற அளவில் பதிவாகியுள்ளது.
இந்தியாவில் ஐபோன் : இந்தியாவில், ஐபோன் 6எஸ் பிளஸ் போன்கள், அக்டோபர் 16ம் தேதி முதல் விற்பனைக்கு வர உள்ளதாக தெரிவிக்கப்பட்டுள்ளது. அக்டோபர் 16ம் தேதி முதல், இந்தியா மட்டுமின்றி, மலேசியா, துருக்கி உள்ளிட்ட நாடுகளிலும், ஐபோன்களின் விற்பனையை 130 நாடுகளுக்கும் மேலாக அதிகரிக்க இருப்பதாக ஆப்பிள் நிறுவனம் தரப்பில் தெரிவிக்கப்பட்டுள்ளது.