அமெரிக்க அதிபராக பதவியேற்கவுள்ள, டொனால்டு டிரம்ப், தெற்கு சீன கடல் பகுதியில் ராணுவ ஆதிக்கத்தை, சீனா விரிவுபடுத்துவதற்கு கடும் கண்டனம் தெரிவித்துள்ளார். ஆசிய நாடுகளில் ஒன்றான தைவானின் அதிபர் ட்சாய் இங் வென்னுடன், டொனால்டு டிரம்ப், நேற்று முன்தினம் பேசினார். அப்போது, தன் அண்டை நாடான சீனா, தெற்கு சீன கடல் பகுதியில் ராணுவ ஆதிக்கத்தை விரிவுபடுத்துவதாக, இங் வென் குற்றம் சாட்டினார்.
இந்நிலையில், 'டுவிட்டர்' சமூக வலைதளத்தில், டிரம்ப் கூறியுள்ளதாவது: தெற்கு சீன கடல் பகுதியில், ராணுவ ஆதிக்கத்தை சீனா விரிவுபடுத்தி வருவது கடும் கண்டனத்துக்கு உரியது. பிற நாடுகளுடன் பொருளாதார போட்டியை அதிகரிக்க, தன் கரன்சியின் மதிப்பை, சீனா குறைத்து வருகிறது. இதுகுறித்து, பிற நாடுகளை பற்றி கவலைப்படாமல், தன்னிச்சையாக சீனா நடவடிக்கை எடுப்பது ஏற்க முடியாதது. இவ்வாறு அவர் கூறியுள்ளார்.